Water Don Pass Garri!– Victor Ukana

By Ikenga Chronicles February 14, 2016

My People I greet una o, d tin wey my eyes see my mouth no fit talk, na him I kukuma say make I write am make una follow me see am. I know know wetin our society wan turn into but the mata wey dey for ground don render me speechless like Micheal Jackson. See as evil don crawl enter family and if dem no control am, e fit turn into societal palaver o.

We sabi say na family be d smallest  unit of d society dat is to say na from family na him society comot from and anytin wey happen for d family must to manifest for d society, so if our family get as e be our society sef go be as e get.

Family need love to grow and to bind d people wey dey inside togeda, even d society need love to grow. Love na sweet tin wey we suppose show ourselves as humans. We fit show love to our follow man, our country, our environment and society even sef to nature and animals. Love sweet welle welle and love suppose bring happiness and joy. Love fit be from parents to children, from children to parents, from papa to mama and from pikin to pikin, from broda to sista and from sista to broda….yes o, love from broda to sista, our people talk say if handshake pass elbow dat one na fight o.

Na so  for my area, one bros love him sista welle welle right from wen dem dey small tin dem big, dem b from d same mama and papa, na small d bros take senior d sista, so I no blame am cos na only d two of dem their parents get. Dem love dem sef so tey dem no dey quarrel or even fight broda and sista fight samsam. Even for area, oda parents come dey take dem do example give their own children.

Dem dey go d same school, go out togeda, do eferitin sef togeda. Anytin wey d sista wan d bobo must buy give am. D bobo even dey fight oda guys wey wan come near d sista, so tey him come turn to d sista personal escort and bodyguard. D two of dem been dey live with their parent even after dem don big, though for separate rooms, sometimes papa and mama go travel leave dem for house togeda with nanny, dem go cater for dem sef. As dem come big dem don come dey so close and use to demsef.

Na of recent, we come notice for area say water don pass garri, d sista don chop belle-full, na there breeze blow, fowl yash com open. Who give her food chop? We wan know…na after long investigashun we com discover say d bobo and him sisita don dey do magogodo.. I mean say, two of dem don dey do mummy and daddy togeda and their parents know know even Nanny no sabi. Na as belle show na him alarm blow. As dem com confront d bros, him no deny am samsam, he talk say him love him sista and say na him score d goal and him no fit love anoda woman oda dan him sista.. sef him go marry d sista , if not him go kill him sef_tufiawka!

Now d parents dey very confuse, how dem wan do dis kind mata? Under their very nose and inside their very house pikin wey dem still dey feed don turn papa and mama bumboi overnite.. dis one na serious gbeke!

Papa and mama make una monitor una children welle welle, watch their waka and activities make una no over look wetin dem dey do. Make una stop to dey form over busy for una children mata. No b to dey hustle morning and nite to provide wetin dem go chop be d only tin ,make una try spend quality time with una children and also pay close attention to their personal mata. E get age wey pikin go reach wey parents suppose to dey put eyes for their body. E get age wey children of opposite sex no suppose to dey do tins togeda or play some kind play togeda even if dem be twin, so parents make una shine una eyes welle welle.

I believe say if to say dis parents been don pay close attention to their children dem for don dey notice say their children mata don pass becareful. Now dem don enter wahala, dem dey at risk of losing both children… My people for dis mata wetin una fit advise d parents to do?


  • Dear Readers, this article is written in Nigerian Pidgin.  Send in your comments and contribution. Thanks.
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment