By Force Marriage

By Ikenga Chronicles March 2, 2016

–Victor Archibong

Like play, like play wetin we dey hear for yonda don reach our doormot. Marriage na the coming togeda of two matured people as husband and wife, meaning say the two people wey dey marry sabi body and dem understand and know wetin dem want and wan do.

Marriage no be by force and no be child’s play even adult wey enter inside sef com see as the tin be dey waka comot not to talk of small pikin wey no sabi body.

My people for obodo naija, one small 13 years old girl for Bayelsa  disapper like willy-willy(ghost) for August last year come go appear for Kano.

After the parent of the girl don find am enter everywer, ask  google, go internet, search twitter even enter instagram, report to police dem no see the pikin. Na of recent dem come hear say na one Mr. Yinusa wey been dey eat for the girl Mama shop na him hijack the pikin.

After him don chop the woman food finish, clean mouth, say Madam your food sweet oo, we know know say him get plan for the woman pikin, say no be only food dey bring am come the shop, na the small girl na him him dey eye, imagine  old papa of 69 years old plus dey eye small pikin of 13 years  old for marriage.

After the small girl disappear the parent come get tip off say the girl dey Emir palace for Kano. As the parent waka reach there, na so dem take eye see say their small girl wey neva reach to clean bum bum don turn full time housewife.

Yinusa don marry their small pikin dem no even  know, dem no even collect any bride price , talkless of attending the marriage sef, to even make the matter worse he don turn their christian pikin to hajia, without their knowledge and consent ; which kind yeye arrangment be dat?

The guy dey even claim for the parent front say the small pikin na 18 years old and don ripe to marry like say na him born the pikin or na him put the girl mama belle, (imagine for person pikin oo) and that’s why him marry the girl. Person small pikin wey him kidnap wey papa and mama no dey aware, he even get moral to change the girl name from Ese Oruru to AISHA.

Abeg, tell me wen the mama suffer carry the pikin belle for nine month, suffer send am go school , where Yinusa dey? Now, him cross borda all the wey from Kano come Bayelsa come carry person small pikin go dey dance Azonto on top, pikin wey still dey Junior Secondary School. He even com dey boast give the parents say nothing dem fit do because him get connection.

Abeg my country people, dis kind tin good? Child marriage na very bad disease wey don dey chop small small enter our society and our people dey close mouth becos na the elite and rich people for the society wey get mouth like kettle dey do am.

Some parents dey even force their small pikin into early marriage to the rich men becos dem no get money cater for the pikin but in dis case the mama and papa of the small girl dey capable to train their pikin and dem even dey sponsor her for school so dat she go get brighter future, na him somebodi from nowhere com stand for corner hijack, kidnap and carry the pikin by force in a wayocious manner , go marry am , change the name, even get mind to brag on top say him get connection and power , nobody fit rescue the small girl from him hand,  dis tin right?

Abeg make we join hand and stand up, kick against dis kind act for our society.






#Free Ese#   #BringbackEse#    #LetsRescue Ese from child marriage#


*Opinions are those of the authors

Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment